(পু)
ইমান ধুনীয়াকৈ
কোনে সৰজিলে, কোনে সৰজিলে
কোনে নামে দিলে জয়া !
তোকে আনিবলৈ
মনে যে বলীয়া, মনে যে বলীয়া
কৰিব নোৱাৰোঁ বিয়া !
(স্ত্ৰী)
বেয়া লাগে দেই !
আহ তই পিলিঙা
যাৱ তই পিলিঙা, যাৱ তই পিলিঙা
বাটৰ মৰে দুবৰি বন !
মোকে ঐ পিলিঙা
নিবকে লাগিলে, নিবকে লাগিলে
ভৰিব লাগিব ধন !
(পু)
দেহি ঐ !
তোকে ঐ নিবৰে মন
তোকে ঐ নিবৰে মন
যেনে তেনে কৰি
নিমে ঐ সাদৰি
লাগিলে ভৰিমে
ধন চেনাই কেঁচা সোণ !
তোৰে সমান হ’ব কোন
অ’ চেনাই ! অ’ সোণাই
লাগিলে ভৰিমে ধন !
(স্ত্ৰী)
এ সে হে হে!
আকাশত জুৰিলে
মলয়াত ঘূৰিলে, মলয়াত ঘূৰিলে
তাৰে যোৰে লগা পাৰ !
তয়ে যে পিলিঙা
মোকে নিব খোজ, মোকে নিব খোজ
কিমান ধন ভাঙিব পাৰ ?
(পু)
হয়নে ?
হালৰে বেচিমে চেনাই
কঁজলা দমৰা ! কঁজলা দমৰা !
গোহালীৰ বেচিমে গাই !
তেও যদি ধনেৰে চেনাই
জোৰাব নোৱাৰোঁ, জোৰাব নোৱাৰোঁ
বেচিম সুদৰৰে ভাই ।
(স্ত্ৰী)
ক’তে মৰোঁ মই !
এইবেলি বানে হে বান !
এইবেলি বানে হে বান !
এইবেলি ব’হাগত
নিব নোৱাৰিলে
দেহালৈ পৰিব টানে মূৰে কেঁচাসোণ
তোৰে সমান হ’ব কোন ?
অ’ মোৰে সোণাই ঐ
দেহালৈ পৰিব টান !
(পু)
জান ঐ !
এ ভনী জয়া মাই
হাতে কি শুৱনি !
এ ভনী জয়া মাই
ডবুৱা কটাৰী
এ ভনী জয়া মাই
ডাবে কি ম’হৰে ঘি !
এ ভনী জয়া মাই
এইবেলি চেনাই ঐ
এ ভনী জয়া মাই
চিন্তা নকৰিবি
এ ভনী জয়া মাই
ঘূৰি ব’হাগতে
নিমে ভনী জয়া মাই !
তোকে আনিবলৈ !
(স্ত্ৰী) ঐ !
(পু) তামোল-পান দিবলৈ !
(স্ত্ৰী) ঐ !
(পু) মোৰ হ’লে ককাই-ভাই নাই !
(স্ত্ৰী) আজৌ ...
হাঁহে বাটে বুলে
লুদুৰে পুদুৰে, লুদুৰে পুদুৰে
পাৰই বাটে বুলে ৰৈ
আমি বাটে বুলোঁ
চেও নিয়া আলিয়ে, চেও নিয়া আলিয়ে
লগৰ সমনীয়া, লগৰ সমনীয়া হৈ ।।